लालूप्रसाद यादव यांना मुलाच्या लग्नासाठी पाच दिवसांचा पॅरोल मंजूर
नवी दिल्ली: चारा घोटाळाप्रकरणी तुरुंगात शिक्षा भोगत असलेले राष्ट्रीय जनता दलाचे प्रमुख आणि बिहारचे माजी मुख्यमंत्री लालूप्रसाद यादव यांना मोठ्या मुलाच्या लग्नासाठी पाच दिवसांचा पॅरोल मंजूर करण्यात आला आहे. लालूप्रसादांचे वकील आणि त्यांच्या जवळच्या सहकाऱ्यांनी ही माहिती दिली.
चारा घोटाळ्यातील तीन प्रकरणांत रांचीतील विशेष सीबीआय न्यायालयाने लालूप्रसाद यांना दोषी ठरवून शिक्षा सुनावली होती. सध्या प्रकृती ठीक नसल्याने त्यांच्यावर झारखंडमधील आरआयएमएस हॉस्पीटलमध्ये उपचार सुरू आहेत. त्यांचे पुत्र आणि आमदार तेजप्रताप यादव आणि राष्ट्रीय जनता दलाच्या आमदार चंद्रिका राय यांची मुलगी ऐश्वर्या राय यांचा १२ मे रोजी विवाह आहे. या सोहळ्याला उपस्थित राहता यावे, यासाठी त्यांना पाच दिवसांचा पॅरोल मंजूर करण्यात आला आहे. आज संध्याकाळी ते पाटणा येथे रवाना होणार आहेत.
