महिलांच्या स्वच्छतागृहात ऑफिस बॉय ठेवायचा मोबाईल, विनयभंगाचा गुन्हा दाखल
हिंजवडी पोलीस ठाण्याच्या हद्दीत असलेल्या एका सॉफ्टवेअर कंपनीतल्या महिला स्वच्छतागृहात एक ऑफिस बॉय गुपचूप मोबाईल ठेवायचा आणि वॉशरूममध्ये येणाऱ्या महिलांचे व्हिडिओ चित्रित करायचा. ही गोष्ट एका महिला कर्मचाऱ्याला लक्षात आली. ज्यानंतर तिने यासंदर्भातली माहिती वरिष्ठांना दिली. विकास अंकुशराव घाडगे असं या ऑफिसबॉयचं नाव आहे. त्याच्याविरोधात पोलिसांनी विनयभंगाचा गुन्हा नोंदवला आहे. विकास फरार झाला असून त्याचा शोध घेण्यासाठी पोलिसांचं एक पथकही रवाना झालं आहे.
पोलिसांनी दिलेल्या माहितीनुसार, विकास घाडगे हा एका सॉफ्टवेअर कंपनीत ऑफिसबॉय म्हणून काम करत होता. महिला वॉशरूमची स्वच्छता करण्याची मुभा त्याला देण्यात आली होती. स्वच्छता करण्यासाठी जेव्हा विकास या वॉशरूममध्ये जायचा तेव्हा तो तिथल्या पीओपी टाईल्समध्ये मोबाईल व्हिडिओ मोडमध्ये ऑन करून ठेवून द्यायचा. एक दिवस त्याला मोबाईल घेऊन जाताना एका महिला कर्मचाऱ्याने पाहिले. तिला संशय आला त्यामुळे, विकास बाहेर येताच तिने वॉशरूममध्ये जाऊन पहाणी केली. त्यावेळी त्या महिलेला छाताच्या बाजूला एक काळ्या रंगाचा मोबाईल आढळून आला. ही बाब समजताच एकच खळबळ उडाली. आपण काय करत होतो हे कंपनीत समजल्याचे विकासला कळले. ज्यानंतर तो पळून गेला, पोलीस आता फरार विकासचा शोध घेत आहेत.