वॉशिंग्टन : केम्ब्रिज अॅनालिटिका कंपनी डेटा लीक प्रकरणानंतर फेसबुकचा सर्वेसर्वा मार्क झुकरबर्गने बुधवारी पुन्हा एकदा तमाम फेसबुक युजर्सची माफी मागून आपल्याला आणखी एक संधी देण्याचं आर्जव केलं आहे. डेटा लीकच्या या प्रकरणात फेसबुकची चूकच झाली, हे मान्य करतानाच सोशल मीडियाच्या जगाचं नेतृत्व करण्यासाठी आपणच योग्य असल्याचंही त्यानं म्हटलं.
प्रसारमाध्यमांशी एका कॉन्फरन्स कॉलवरून बोलताना झुकरबर्गने खासगी वापरकर्त्यांना माहितीचोरी करता येऊ नये ही जबाबदारी आपलीच असल्याचे मान्य केले. ‘केम्ब्रिज अॅनालिटिका या लंडनस्थित राजकीय सल्लागार कंपनीला विशेषत: अमेरिकेतल्या ८७ दशलक्ष लोकांची माहिती अयोग्य पद्धतीने शेअर झाली,’ अशी कबुली झुकरबर्गने दिली.
‘ही खूप मोठी चूक होती. ही माझी चूक होती. हो. माणसं चुका करतात आणि त्यातून शिकतात. मी मान्य करतो की आम्ही आमच्यावरील जबाबदाऱ्यांचा व्यापक अंगाने अभ्यास केला नाही. चुकांमधून आम्ही धडा घेतोय की नाही यासाठी लोकांनी आम्हाला जबाबदार धरायला हवं,’ असं तो म्हणाला.
