breaking-newsTOP Newsताज्या घडामोडीपुणे

पुण्यात नगरसेविकेच्या पतीची दादागिरी; वैद्यकीय अधिकाऱ्याला मारहाण

पुणे – करोना पॉझिटिव्ह रुग्णांच्या कुटुंबीयांची तपासणी करण्यासाठी आलेल्या मुख्य वैद्यकीय अधिकाऱ्यालाच शिवीगाळ करून मारहाण केल्याचा प्रकार समोर आला आहे. या प्रकरणी खडकी पोलिसांनी नगरसेविकेच्या पतीसह पुतण्याला अटक केली आहे. ‘करोना रुग्णाला दवाखान्यात दाखल करून घेत नाही; मग सर्व्हे कशाला करायला येता,’ अशी विचारणा करून मारहाण करण्यात आल्याचे समजते.

कैलास डेमाजी पहिलवान (वय ५०) , किरण शंकर पहिलवान (४०, दोघेही रा. नीता अपार्टमेंट, खडकी) अशी अटक केलेल्यांची नावे आहेत. याबाबत डॉ. शाहीन कुजंयप्पन चारतामकुढत (४९, रा. ऑर्डिनन्स इस्टेट) यांनी तक्रार दिली आहे. त्यानुसार तीन महिलांसह सहा जणांवर मारहाण करून सरकारी कामात अडथळा निर्माण केल्याचा गुन्हा पोलिसांनी दाखल केला आहे. बुधवारी सकाळी दहाच्या सुमारास हा प्रकार रेंजहिल इस्टेट परिसरात घडला.

डॉ. शाहीन चारतामकुढत हे खडकीतील ऑर्डिनन्स फॅक्टरी रुग्णालयामध्ये मुख्य अधिकारी म्हणून कार्यरत आहेत. बुधवारी सकाळी दहाच्या सुमारास ते रुग्णालयातील कर्मचाऱ्यांबरोबर रेंजहिल इस्टेट परिसरात करोना सर्व्हे व रुग्णांच्या नातेवाइकांची तपासणी करण्यासाठी गेले होते. त्या वेळी पॉझिटिव्ह रुग्णाच्या नातेवाइकांनी संबंधित विभागातील नगरसेविकेचे पती आणि पुतण्याला त्याठिकाणी बोलावून घेतले. त्यानंतर आरोपींनी डॉक्टरांना, ‘तुम्ही कोव्हिड पेशंटला हॉस्पिटलमध्ये दाखल करून घेत नाही. माझ्या वडिलांना तुम्ही दुसऱ्या दवाखान्यात पााठविले; मग सर्व्हे कशाला करायला येता,’ असे म्हणून डॉक्टरांसह त्यांच्या सहकाऱ्यांना शिवीगाळ केली. त्यानंतर आरोपींनी डॉ. शाहीन यांना मारहाण केली. डॉक्टर आपल्या टीमसह रुग्णालयाकडे निघाले असता, आरोपींनी त्यांचा रस्ता अडवून ते करीत असलेल्या सरकारी कामात अडथळा निर्माण केला. पोलिस उपनिरीक्षक सचिन पवार या प्रकरणी पुढील तपास करीत आहेत.

Job AlertJob Alert Job Alert Job Alert

Related Articles

Leave a Reply

Your email address will not be published. Required fields are marked *

Back to top button