पुणे-मुंबई विस्कळीत झालेली रेल्वे सेवा आजपासून सुरळीत
- कर्जत ते लोणावळा मेगा ब्लाॅक रद्द
पिंपरी ( महा ई न्यूज ) – मुंबईमध्ये झालेल्या जोरदार पावसामुळे गेल्या दोन दिवसांपासून विस्कळित झालेली रेल्वे सेवा आज, सोमवारपासून (२९ जुलै) सुरळीत होणार आहे. पुण्याहून मुंबईला जाणाऱ्या डेक्कन क्वीन, सिंहगड, इंटरसिटी, इंद्रायणी या गाड्यांसह अन्य गाड्याही नियोजित वेळेत धावणार असल्याचे रेल्वेने स्पष्ट केले आहे.
पुणे-मुंबई लोहमार्गावर कोसळलेली दरड आणि मुंबईतील जोरदार पावसामुळे मागील दोन दिवसांपासून रेल्वेचे वेळापत्रक ठप्प झाले होते. रविवारीही (२८ जुलै) पुणे- मुंबई मार्गावरील अनेक गाड्या रद्द झाल्याने प्रवाशांचे हाल झाले. मात्र, रविवारी पाऊस थांबल्याने काहीसा दिलासा मिळाला असून, कर्जत ते लोणावळा दरम्यान घेतलेल्या मेगा ब्लॉकमुळे रद्द करण्यात आलेल्या गाड्या सोडून अन्या गाड्या त्यांच्या नियोजित वेळेत धावणार आहेत.
शनिवारी आणि रविवारी बंद असलेल्या गाड्या सोमवारी नियोजित वेळेवर धावणार असल्याचे सांगण्यात आले आहे. तसे नियोजनही आहे. मात्र, सोमवारी अचानक पाऊस वाढल्यास स्थिती पाहून वेळेत बदल केले जातील, असे रेल्वे प्रशासनाकडून स्पष्ट करण्यात आले.
…………
रविवारी रद्द झालेल्या गाड्या
– मुंबई-पुणे-मुंबई इंटरसिटी एक्स्प्रेस
– मुंबई-हैदराबाद हुसेन सागर एक्स्प्रेस
– हुजूर साहिब नांदेड-पनवेल एक्स्प्रेस
………….
सोमवारी रद्द होणाऱ्या गाड्या
– पनवेल-हुजूर साहिब नांदेड एक्स्प्रेस
– मुंबई-हैदराबाद एक्स्प्रेस
