पिंपरी चिंचवड पोलीस आयुक्तालय 15 आॅगस्टपासून सुरु
पिंपरी ( महा ई न्यूज ) – पिंपरी-चिंचवड पोलीस आयुक्तालयाचा स्वतंत्र कारभार येत्या 15 ऑगस्ट (बुधवार) पासून सुरु होणार आहे. त्याबाबतचे अध्यादेश राज्य सरकारच्या गृहविभागाने आज (शुक्रवारी) काढले आहे. दरम्यान पिंपरी-चिंचवड पोलीस आयुक्तालयाच्या कार्यक्षेत्रात येणा-या परिमंडळ हद्दीमध्ये बदल करण्यात आला आहे. त्याबाबतचा प्रस्ताव आयुक्त आर. के. पद्मनाभन यांनी शासनाकडे सादर केला आहे.
28 मे 2018 रोजी काढण्यात आलेल्या शासन निर्णयाद्वारे पोलीस आयुक्त पुणे शहर आणि पोलीस अधीक्षक पुणे ग्रामीण यांच्या कार्यक्षेत्राचे विभाजन करून पिंपरी-चिंचवड महापालिका व परिसरासाठी पिंपरी-चिंचवड पोलीस आयुक्तालय निर्माण करण्यात आले आहे. या आयुक्तालयाचे प्रत्यक्ष कामकाज येत्या बुधवार (15 ऑगस्ट) पासून सुरु होणार आहे. पुणे पोलीस आयुक्तालयाच्या परिमंडळ तीनचे पोलीस उप आयुक्तांच्या कार्यालय इमारतीमधून आयुक्तालयाचा कारभार सुरु होणार आहे. तर कंट्रोल रूम पिंपरी पोलीस ठाण्यात असलेल्या जिमच्या जागेतून सुरु करण्यात येणार आहे.