निर्भया बलात्कार प्रकरण : दोषी पवनकुमारची याचिका सुप्रीम कोर्टाने फेटाळली
दिल्लीतील निर्भया बलात्कार प्रकरणातील दोषी पवनकुमार गुप्ता याची फाशीच्या शिक्षेविरोधात दाखल करण्यात आलेली याचिका सर्वोच्च न्यायालयाने सोमवारी फेटाळली. गुन्हा घडला त्यावेळी आपण अल्पवयीन होतो, असा युक्तिवाद पवनकुमार गुप्ता याच्या वकिलांनी केला. पण सर्वोच्च न्यायालयाने तो फेटाळला आणि त्याला सुनावलेली शिक्षा कायम ठेवली. निर्भया बलात्कार प्रकरणात एकूण ४ दोषींना फाशीची शिक्षा सुनावण्यात आली आहे. त्यांच्याविरुद्ध डेथ वॉरंट जारी करण्यात आले असून, येत्या १ फेब्रुवारीला या चौघांना फाशी देण्यात येणार आहे.
न्या. आर. बानूमथी यांच्या नेतृत्त्वाखालील खंडपीठामध्ये या प्रकरणी सुनावणी झाली. १६ डिसेंबर २०१२ मध्ये जेव्हा ही घटना घडली. त्यावेळी आपण अल्पवयीन होतो, असा युक्तिवाद पवनकुमार गुप्ता याने न्यायालयात केला. फाशीची शिक्षा रद्द केली जावी, अशी मागणी त्याच्या वकिलांनी केली. पण न्यायालयाने ती फेटाळली. पवन गुप्ताची जन्मतारीख ८ ऑक्टोबर १९९६ होती. पण दिल्ली पोलिसांनी मोठा कट रचून त्याच्या जन्मतारखेत फेरफार केल्याचा युक्तिवाद त्याच्या वकिलांनी केला. पण न्यायालयाने तो फेटाळला आणि त्याची शिक्षा कायम ठेवली.