सांगली – नागपंचमीला नागांचे पूजन करण्याची प्रथा असलेल्या सांगली जिल्ह्यातील शिराळा तालुक्यात शेतक-याला नांगरणी करताना नागाची १९ अंडी सापडली होती. शामराव निकम या शेतक-याने ३० जूनला सर्व अंडी वन विभागाकडे दिली होती. अंड्यांमधून जन्मलेली १९ पिले वन विभागाने बुधवारी नैसर्गिक अधिवासात सोडली.
सांगली जिल्ह्यातील बत्तीस शिराळा हे शहर नागपंचमीच्या उत्सवासाठी जगप्रसिद्ध आहे. जिवंत नागांचे पूजन करण्याच्या प्रथेवर कायद्याने निर्बंध आल्यानंतर या परिसरात दरवर्षी नागांची प्रतिकात्मक पूजा केली जाते. शिराळा वन परिक्षेत्रातील कापरी गावाच्या हद्दीत निकम मळा येथे शेतकरी शामराव निकम यांना शेतात नांगरणी करताना १९ अंडी आढळली होती. निकम आणि प्राणीमित्र प्रा. सुशीलकुमार गायकवाड यांनी अंड्यांची माहिती वनविभागाला कळवली.
वनपाल सी. पी. देशमुख आणि वनरक्षक सचिन पाटील यांनी घटनास्थळावर पोहचून अंडी ताब्यात घेतली. या अंड्यांमधून १९ पिलांचा जन्म झाल्यानंतर बुधवारी सर्व पिले निसर्ग अधिवासात सोडण्यात आली. यावेळी वनक्षेत्रपाल सुशांत काळे, वनपाल चंद्रकांत देशमुख, वनरक्षक सचिन पाटील, बाबा गायकवाड तसेच प्राणीमित्र प्रा. सुशीलकुमार गायकवाड, सुजय गायकवाड, आदी उपस्थित होते.
