धक्कादायक…! व्हेल माशाच्या पोटात ८० प्लास्टिकच्या पिशव्या
बँकॉक: प्लास्टिक पिशव्यांमुळे पर्यावरणाची हानी होते हे आपल्याला ठाऊक आहेच. मात्र, हाच प्लास्टिकचा कचरा आणि पिशव्यांचा वाईट परिणाम भटक्या जनावरांवर होताना आपण पहिला आहे. मात्र आता याचा दुष्परिणाम सागरी जीवांवर होताना दिसत आहे. काही दिवसांपूर्वी थायलंडच्या किनाऱ्यावर मोठा व्हेल मासा आढळला. या व्हेल माशाच्या पोटात जवळपास ८० हून अधिक प्लास्टिकच्या पिशव्या आढळून आल्या. या भल्या मोठ्या व्हेल माशाला पुन्हा समुद्रात सोडण्यासाठी कोस्टगार्ड, स्थानिक मच्छिमार आणि नागरिकांनी अनेक प्रयत्न केले. मात्र दुर्दैवाने त्या व्हेल माशाचा मृत्यू झाला. त्यानंतर या व्हेल माशाची ऑटप्सी करण्यात आली. तेव्हा त्याच्या पोटात ८० प्लास्टिकच्या पिशव्या म्हणजे तब्बल ८ किलो प्लास्टिक सापडले. मरण्यापूर्वीदेखील देवमाशाच्या तोंडून चिकट पदार्थ बाहेर फेकला गेला आणि त्यातही प्लास्टिकच्या पिशव्या आढळल्या.
थायलंडच्या दक्षिण भागातील सोंगखलाच्या समुद्र किनाऱ्यावर हा व्हेल मासा बेशुद्ध अवस्थेत आढळला होता. त्यानंतर डॉक्टरांच्या एक टीमने या माशावर उपचार सुरु केले. प्लास्टीक पदार्थ पोटात गेल्याने माशांची वाढ खुंटते व त्यांचे आयुष्य कमी होते, गेल्या वर्षभरात किनाऱ्यावर व्हेल मासा, डॉल्फिन वाहून येण्याचे आणि त्यांच्या पोटात प्लास्टिक सापडण्याचे प्रमाण वाढत आहे अशी माहिती सागरी जीव अभ्यासकांनी दिली आहे.
एप्रिल महिन्यात स्पेनच्या किनाऱ्यावरदेखील देवमासा वाहून आला होता त्याच्या पोटात २९ किलो प्लास्टिक पिशव्या आढळून आल्या होत्या. थायलंडमध्ये प्लास्टिकची समस्या दिवसेंदिवस वाढत असून येत्या ‘जागतिक महासागर दिनानिमित्त’ याबद्दल जनजागृती करण्यासाठी भर देण्यात येईल असेही सागरी जीव अभ्यासक म्हणाले.