तेरे नाम की कोई… ‘धडक’मधील गाणे रिलीज
करण जोहरच्या धर्मा प्रॉडक्शन्सची निर्मिती असलेल्या ‘धडक’ चित्रपटातील गाणे रिलीज केले आहे. अजय गोगावले आणि श्रेया घोषाल यांच्या आवाजातील ‘तेरे नाम की कोई धडक है ना’ हे गाणे यूट्यूबवर अपलोड करण्यात आले आहे. इशान खट्टर आणि जान्हवी कपूर यांची मुख्य भूमिका असलेला ‘धडक’ हा नागराज मंजुळेंच्या गाजलेल्या ‘सैराट’ या मराठी सिनेमाचा अधिकृत हिंदी रिमेक आहे.
‘सैराट’मध्ये आर्ची-परशाची जोडी होती, तर ‘धडक’मध्ये मधुकर आणि पार्थवी अशी मुख्य व्यक्तिरेखांची नावे आहेत. सैराटची कथा सोलापुरात घडते तर धडकमध्ये राजस्थानची पार्श्वभूमी आहे. करण जोहर, झी स्टुडिओ, हिरु यश जोहर, अपूर्वा मेहता यांची निर्मिती असलेल्या धडक सिनेमाच्या शूटिंगला डिसेंबरमध्ये सुरुवात झाली. शशांक खैतान या चित्रपटाच्या दिग्दर्शनाची धुरा सांभाळत आहे.
‘धडक’ चित्रपट 20 जुलै 2018 रोजी प्रेक्षकांच्या भेटीला येणार आहे. हा चित्रपट 21 वर्षांच्या जान्हवीचा डेब्यू आहे. 22 वर्षीय इशान मात्र माजिद माजिदी यांच्या ‘बियाँड द क्लाऊड्स’मध्ये झळकला होता. तर ‘उडता पंजाब’मध्येही त्याने लहानशी भूमिका साकारली होती. एप्रिल 2016 मध्ये प्रदर्शित झालेल्या सैराटने बॉक्स ऑफिसवर कोट्यवधींची कमाई केली होती. तर अनेक पुरस्कारही खिशात घातले होते. त्यामुळे हिंदी रिमेक असलेला धडक बॉक्स ऑफिसवर काय कमाल करतो, हे प्रदर्शनानंतरच कळेल.’