… तर पिंपरी-चिंचवड महापालिकेचे 983 कोटी वाचले असते’ – सचिन सावंत
गुजरातप्रेमापुढे पंतप्रधान नरेंद्र मोदी व गृहमंत्री अमित शहाना काही दिसत नाही,
मुंबई – ‘येस बँकेवर निर्बंध घालण्याच्या एक दिवस आधीच बडोदा महानगरपालिकेच्या बडोदा स्मार्ट डेव्हलमेंट कंपनीचे २६५ कोटी रुपये काढून घेण्यात आले होते. भाजपची सत्ता असलेल्या पिंपरी-चिंचवड महापालिकेलाही याची कल्पना दिली गेली असती तर त्यांचेही 983 कोटी रुपये वाचले असते. पण गुजरातप्रेमापुढे पंतप्रधान नरेंद्र मोदी व केंद्रीय गृहमंत्री अमित शहा यांना इतर कोणी दिसत नाही,’ असा टोला महाराष्ट्र काँग्रेसचे प्रवक्ते सचिन सावंत यांनी हाणला आहे.
‘येस’ बँकेतील निर्बंधांच्या पार्श्वभूमीवर सचिन सावंत यांनी आपल्या अधिकृत ट्विटर हँडलवरून देशातील बँकांच्या स्थितीवर भाष्य करताना मोदी-शहांवर टीका केली आहे. ‘येस’ बँकेवर निर्बंध घातल्यानं महाराष्ट्रातील १०९ बँका अडचणीत आल्या असून यात विदर्भातील मध्यवर्ती बँकांसह काही सहकारी बँकाही आहेत. तसंच, अनेक पतसंस्थांच्या ठेवीही याच बँकेत आहेत. त्यामुळं या पतसंस्थाही अडचणीत सापडल्या आहेत, अशी माहिती सावंत यांनी दिली आहे.
‘बडोदा महानगरपालिकेच्या बडोदा स्मार्ट डेव्हलमेंट कंपनीचे २६५ कोटी रुपये येस बँकेवर निर्बंध घालण्याच्या एक दिवसाआधीच काढून घेण्यात आल्याचा दावा करताना सावंत यांनी मोदी-शहांवर टीका केली आहे. ‘यांना देशाची नव्हे फक्त गुजरातचीच काळजी असते हे पुन्हा एकदा दिसून आलं आहे. पिंपरी-चिंचवड महानगरपालिकेत भाजपाची सत्ता आहे. या महानगरपालिकेचे 983 कोटी रुपये येस बँकेत आहेत. मोदी-शहांनी बडोदा महापालिकेसारखेच किमान पिंपरी चिंचवड महापालिकेच्या कानात जरी सांगितले असते. तरी ते या संकटातून वाचले असते, पण गुजरातप्रेमापुढे त्यांना इतर कोणी दिसत नाही असेच म्हणावे लागते, असा सणसणीत टोलाही सावंत यांनी लगावला आहे.
