डिप्लोमा अभ्यासक्रमांना प्रवेश घेण्यासाठी अर्ज करण्याचा आजचा शेवटचा दिवस

दहावी आणि बारावीनंतरच्या डिप्लोमा अभ्यासक्रमांना प्रवेश घेण्यासाठी राबविण्यात येणाऱ्या प्रवेश प्रक्रियेत ऑनलाइन पद्धतीने अर्ज सादर करणे; तसेच अर्जाची पडताळणी करण्याची आज गुरुवारी १० सप्टेंबर अखेरची मुदत आहे. त्यामुळे विविध कारणांमुळे प्रवेश प्रक्रियेत अर्ज करू न शकणाऱ्या विद्यार्थ्यांना अर्ज करण्यासाठी आज शेवटचा दिवस आहे.

तंत्रशिक्षण संचालनालयाकडून (डीटीई) दहावीनंतरच्या इंजिनीअरिंग डिप्लोमा (पॉलिटेक्निक); तसेच बारावीनंतरच्या फार्मसी, ‘सर्फेस कोटिंग टेक्नॉलॉजी’, हॉटेल मॅनेजमेंट अँड केटरिंग टेक्नॉलॉजी अशा डिप्लोमा अभ्यासक्रमांच्या प्रवेश प्रक्रिया १० ऑगस्टपासून राबविण्यात येत आहेत. करोनामुळे उद्‌भवलेल्या एकूण परिस्थितीचा विचार करून ‘डीटीई’ने प्रवेश अर्ज करण्याची मुदत वाढवून द्यावी; तसेच राखीव प्रवर्गातून प्रवेश घेण्यास इच्छुक असणाऱ्या विद्यार्थ्यांना कागदपत्रे व दाखले जमा करण्यासाठी कालावधी वाढवून देण्याची मागणी पालकांकडून करण्यात आली होती.

यावर ‘डीटीई’ने अर्ज सादर करण्याची मुदत १० सप्टेंबरपर्यंत वाढवून दिली आहे. या कालावधीत अर्जाची पडताळणी करावी लागणार आहे. मात्र, कागदपत्रे जमा करण्यासाठी कोणत्याही प्रकारचा वाढीव कालावधी दिलेला नाही. दरम्यान, या कालावधीनंतर प्रवेश अर्ज करण्यासाठी मुदतवाढ मिळणार नसल्याची शक्यता आहे. त्यामुळे विद्यार्थी-पालकांनी शेवटची मुदतवाढ लक्षात घेऊन कार्यवाही करावी, अशी सूचना ‘डीटीई’कडून करण्यात आली आहे.

अंतिम गुणवत्ता यादी १८ सप्टेंबरला

प्रवेशासाठी आवश्यक असणारी तात्पुरती गुणवत्ता यादी १३ सप्टेंबर रोजी जाहीर होणार असून, त्याबाबत आक्षेप नोंदवण्यासाठी १४ ते १६ सप्टेंबर अशी मुदत दिली आहे. त्यानंतर १८ सप्टेंबर रोजी अंतिम गुणवत्ता यादी जाहीर होणार आहे. अधिक माहिती www.dtemaharashtra.gov.in या वेबसाइटवर उपलब्ध आहे.