चक्क… 25 तोळे सोन्याची बॅक रिक्षाचालकांनी केली परत
रिक्षाचालकांच्या प्रामाणिकपणाचे सर्वस्तरातून होतेय काैतूक
पुणे |महाईन्यूज |प्रतिनिधी|
दोन रिक्षाचालक आणि रेल्वे पोलिसांच्या प्रामाणिकपणामुळे रिक्षात विसरून गेलेले २५ तोळे सोने प्रवाशाला परत मिळाले. या सोन्याची किंमत ७ लाख ५७ हजार रुपये एवढी असून रिक्षाचालक आणि पोलिसांच्या प्रामाणिकपणाचे सर्वस्तरातून कौतुक होत आहे.
दीपक पांडुरंग चित्राला हे हडपसर येथील वनश्री अपार्टमेंट येथे राहतात. ते सकाळी साडे आठच्या सुमारास त्यांची बॅग पुणे रेल्वे स्थानकाजवळ पार्किंग बूथवर विसरले होते. ही बेवारस बॅग आढळून आल्याने अतुल पांडुरंग टिळेकर आणि भरत किसन भोसले या दोन रिक्षाचालकांनी रेल्वे पोलीस संजय सोनवणे, कुलकर्णी आणि कुटे यांना त्याबद्दलची माहिती दिली. त्यानंतर रेल्वे पोलिसांनी ही बेवारस बॅग ताब्यात घेतली. ही बॅग उघडून पाहिली असता त्यात सोनेचांदी सापडले.
त्यात चांदीची फुलदाणी, करंडा, तीन तोळे सोन्याचं मंगळसूत्रं, चार तोळ्याच्या चार सोन्याच्या बांगड्या, एक तोळ्याचे कानातील कर्णफूले, तीन तोळ्याचा स्टोनवाला नेकलेस, अर्ध्या तोळ्याची सोनसाखळी, पाच तोळ्याचा सोन्याचा नेकलेस आदी ७ लाख ५७ हजाराचा ऐवज या बॅगेत सापडला. त्यामुळे पोलिसांनी बॅगेत अधिक झडती घेतली असता त्यात चित्राला यांचा फोन नंबर सापडला. पोलिसांनी तात्काळ चित्राला यांना फोन करून रेल्वे पोलीस ठाण्यात बोलावलं. त्यानंतर बॅग आणि दागिण्यांची ओळख पटवून त्यांना त्यांची बॅग परत केली. पोलीस आणि रिक्षाचालकांनी दाखवलेल्या या प्रामाणिकपणा मुळे चित्राला यांची बॅग मिळाली. त्यामुळे या टीमचं सर्वस्तरातून कौतुक होत आहे.