महोबा : उत्तर प्रदेशातील महोबा जिल्ह्यात एका क्षुल्लक कारणावरून पतीने पत्नीला तोंडी तलाक दिला आहे. पत्नीने चपाती करपवली म्हणून तिच्या पतीने तिला तलाक दिला आहे. त्याने तोंडी तलाक दिल्यानंतर पत्नीवर त्याला सोडण्यासाठी दबाव आणण्यात आला.
महोबा जिल्ह्यातल्या पहरेथा गावात ही घटना घडली. २४ वर्षीय रझियाने तिच्या पतीविरोधात पोलीस ठाण्यात तक्रार केली आहे. तिने सांगितले की, मागील वर्षी ४ जुलै २०१७ रोजी तिचं लग्न निहाल खानशी झाले. लग्नानंतर निहाल खान तिचा छळ करू लागला. रझियाने सांगितले, ‘तीन दिवसांपूर्वी रात्रीच्या जेवणात थोडीशी करपलेली चपाती वाढली म्हणून तो मला ओरडला. त्याने तीन वेळा तलाक म्हटले आणि मला घराबाहेर काढले. मी जाण्यास नकार दिला तेव्हा मला सिगरेटचे चटके दिले.’
‘महिलेच्या तक्रारीवरून या प्रकरणी पतीविरुद्ध तक्रार दाखल करण्यात आली आहे,’ अशी माहिती पोलीस उपअधीक्षक बंशराज यादव यांनी दिली. मागील वर्षी २२ ऑगस्टला सर्वोच्च न्यायालयाने तिहेरी तलाकवर सुनावणी देताना, ही प्रथा घटनाबाह्य असल्याचा निर्णय दिला होता. तसेच याबाबत संसदेत कायदा करण्याचे आदेश केंद्र सरकारला दिले होते.
