नवी दिल्ली: व्हॉट्सअॅपवर अनेकदा बोगस मेसेज फॉरवर्ड केले जातात. मात्र, आता हे फॉरवर्ड मेसेज ओळखता येणार आहेत. व्हॉट्सअॅपने एक नवीन फीचर आणले आहे. त्याद्वारे संबंधित मेसेज फॉरवर्ड केलेला आहे की टाइप करून पाठवण्यात आला आहे हे कळणार आहे.
व्हॉट्सअॅपने हे फीचर अॅण्ड्रॉइड बीटा (2.18.179) व्हर्जनमध्ये लाँच केले आहे. यूजर्सने व्हॉट्सअॅपवर एखादा मेसेज फॉरवर्ड पर्याय निवडून इतरांना पाठवला असेल तर, त्या मेसेजच्या वरच्या भागात ‘फॉरवर्डेड’ असा उल्लेख असेल. त्यामुळे ज्या व्यक्तीला मेसेज पाठवला आहे, तिला तो फॉरवर्ड मेसेज असल्याचे समजेल. मात्र, मेसेज कॉपी आणि पेस्ट करून पाठवला असल्यास त्यावर ‘फॉरवर्डेड’ असा उल्लेख नसणार आहे. याआधी व्हॉट्सअॅपने मीडिया व्हिजिबिलिटी आणि न्यू कॉन्टॅक्ट शॉर्टकट असे दोन फीचर लाँच केले होते.
