पिंपरी – मावळ लोकसभा मतदारसंघात आचारसंहिता भंगाच्या २५३ तक्रारी दाखल झाल्या असून, सर्वच तक्रारींचे निरसन करण्यात आले आहे. त्यात आॅनलाइन तक्रारींचे प्रमाण अधिक आहे. २४१ तक्रारी आॅनलाइन आणि १२ तक्रारी आॅफलाइन दाखल झाल्या आहेत. निवडणुकीबाबत नागरिकांची सजगता वाढल्याचे दिसून येत आहे. मावळ लोकसभा निवडणुकीची रणधुमाळी रंगात आली आहे. केंद्रीय निवडणूक आयोगाच्या वतीने आचारसंहिता भंगाचे गुन्हे दाखल करण्यास सुरुवात झाली आहे. निवडणूक प्रक्रिया शांततेत व पारदर्शकपणे पार पाडण्यासाठी आयोगाचे प्रयत्न सुरू आहेत.
आचारसंहिता भंगाच्या सर्वाधिक तक्रारी पिंपरीत दाखल झाल्या आहेत. ९२ तक्रारी पिंपरीत तर त्यापाठोपाठ चिंचवडला ८२, मावळला ४४ आणि सर्वांत कमी तक्रारी पनवेलमध्ये दाखल झाल्या आहेत. तसेच आॅफलाइन तक्रारी सर्वाधिक चार या पिंपरी विधानसभेत, चिंचवडमध्ये तीन आणि मावळ, उरणमध्ये प्रत्येकी एक तक्रार दाखल झाली आहे. आचारसंहिता भंगाच्या २५३ तक्रारींवर कार्यवाही केली असून, सर्वच तक्रारी निकाली काढल्या आहेत. प्रलंबित तक्रारी अजिबात नाहीत.
निवडणुकीतील गैरप्रकारांना आळा बसावा व अनुचित प्रकार टाळण्यासाठी यंदा नागरिकांना आॅनलाइन तक्रारी नोंदविण्यासाठी अ‍ॅप विकसित केले आहे. त्यावर नागरिकांच्या तक्रारी अधिक दाखल होत आहेत. मतदारसंघात आचारसंहितेच्या उल्लंघनाची माहिती देण्यासाठी अ‍ॅपद्वारे फोटो अथवा दोन मिनिटांपर्यंतचा व्हिडीओ काढून तो अपलोड करणे अपेक्षित आहे. तसेच आॅफलाइन तक्रारींची सुविधाही निवडणूक आयोगाने उपलब्ध करून दिली आहे.
सुरुवातीच्या कालखंडात खोट्या तक्रारी दाखल होण्याचे प्रमाण अधिक होते. मात्र, त्यांची तपासणी काटेकोरपणे होत असल्याने दुस-या आणि महत्त्वाच्या टप्प्यात खोट्या तक्रारींचे प्रमाण कमी झाले आहे. तपासणीमुळे खोट्या तक्रारदारांना चाप बसणार आहे.
