आंध्र प्रदेशचे मुख्यमंत्री जगन मोहन रेड्डी यांच्या सरकारने आज त्याचा पहिला अर्थसंकल्प सादर केला. आंध्र प्रदेशचे अर्थमंत्री बुग्गना राजेंद्रनाथ यांनी विधानसभेत अर्थसंकल्प मांडला. यावेळी अर्थसंकल्पाच्या माध्यमातून अनेक लोकप्रिय घोषणा करण्यात आल्या असून आंध्र प्रदेशमधील जनतेला सरकारने अनेक गिफ्ट दिले आहेत. महत्त्वाचं म्हणजे अर्थसंकल्पात आंतरजातीय विवाहासाठी ४१ हजार कोटींची तरतूद करण्यात आली आहे.
आंतरजातीय विवाह करणाऱ्या दांपत्यांना प्रोत्साहन देण्यासाठी ४१ कोटी रुपयांची तरतूद करण्यात आली असल्याची माहिती अर्थमंत्री बुग्गना राजेंद्रनाथ यांनी अर्थसंकल्प मांडताना दिली. राज्य सरकारने या निर्णयामुळे आंध्र प्रदेशमध्ये आंतरजातीय विवाहाचे प्रमाण वाढेल, अशी शक्यता वर्तवली आहे. आंध्र प्रदेशात गेल्या काही महिन्यात आंतरजातीय विवाहातून हल्ला झाल्याच्या घटना वाढल्या आहेत. याच पार्श्वभुमीवर हा निर्णय घेण्यात आला आहे.
आंध्र प्रदेशचे माजी मुख्यमंत्री चंद्राबाबू नायडू यांनी याआधी गतवर्षी आंतरजातीय विवाहासाठी चंद्रान्ना पेल्ली कनुका अशी योजना सुरु केली होती. या योजनेनुसार अनुसुचीत जातीच्या मुलाने अनुसुचीत जातीच्या मुलीसोबत लग्न केलं तर सरकारकडून ४० हजार रुपयांची मदत दिली जात होती. तसंच इतर मागासवर्गीय मुलाने इतर मागासवर्गीय मुलीसोबत लग्न केलं तर सरकारकडून ३० हजार रुपये दिले जात होते. पण आता या रकमेत वाढ केली जाऊ शकते.
