पुणे : माहिती अधिकार कार्यकर्ते सतीश शेट्टी यांच्या हत्येप्रकरणी सीबीआयने आयआरबी कंपनीचे प्रमुख वीरेंद्र म्हैसकर यांना क्लीन चिट दिली आहे. या प्रकरणाचा तपास करताना कोणताही नवा पुरावा मिळाला नाही, तसेच आयआरबी कंपनीचा या प्रकरणाशी कोणताही संबंध आढळून आलेला नाही, असं सीबीआयने न्यायालयात दाखल केलेल्या अहवालात म्हटले आहे.
१३ जानेवारी २०१० मध्ये पुण्याजवळील तळेगाव-दाभाडे येथे सतीश शेट्टी यांची हत्या झाली होती. सतीश शेट्टींचे भाऊ संदीप शेट्टी यांनी म्हैसकर यांच्यावर हत्येचा आरोप केला होता. मागील वर्षी डिसेंबर महिन्यात पुणे न्यायालयाने या प्रकरणी वीरेंद्र म्हैसकर यांच्यासह १२ आरोपींना जामीन मंजूर केला होता. या प्रकरणाचा खटला सुरू असतानाच सीबीआयने म्हैसकर यांना या प्रकरणातून दोषमुक्त केलं.
या प्रकरणात सुरुवातीपासूनच सीबीआयची भूमिका संशयास्पद असल्याचं म्हटलं जात आहे. २०१४ मध्येच सीबीआयने ही केस बंद केली होती. पण २०१५ मध्ये पुन्हा या प्रकरणाचा तपास सुरू झाला. या प्रकरणात आधी तपास अधिकारी असलेल्या तत्कालीन पोलीस निरीक्षकांनाच पुढे आरोपी ठरवत येरवडा कारागृहात ठेवण्यात आले होते.
