राहुल गांधी यांच्या गाडीवरील हल्याच्या निषेधार्थ काँग्रेसचे पिंपरीत आंदोलन

पिंपरी: अखिल भारतीय काँग्रेसचे उपाध्यक्ष व खासदार राहुल गांधी यांच्या गाडीवर शुक्रवारी (दि.4) गुजरातमध्ये झालेल्या दगडफेकीच्या निषेधार्थ पिंपरी-चिंचवड शहर काँग्रेसतर्फे आंदोलन करण्यात आले.

पिंपरीतील, डॉ. बाबासाहेब आंबेडकर पुतळा चौकात आज (शनिवारी) हे आंदोलन झाले. यावेळी काँग्रेसचे शहराध्यक्ष सचिन साठे, सरचिटणीस सजी वर्की, श्यामला सोनवणे, बिंदु तिवारी, शोभा मिरजकर, संग्राम तावडे, युवक काँग्रेसचे नरेंद्र बनसोडे, सुदाम ढोरे, राजेंद्र वालिया, मयुर जयस्वाल, क्षितीज गायकवाड, वीरेंद्र गायकवाड, ज्येष्ठ नागरिक संघाचे लक्ष्मण रुपनर, अनिरुद्ध कांबळे, सौरभ शिंदे, वसंत मोरे आदी कार्यकर्ते आंदोलनात सहभागी झाले होते.

गुजरातमधील पूरग्रस्त बनासकांठा जिल्ह्यात धानेरा येथील नागरिकांना भेटण्यासाठी शुक्रवारी राहुल गांधी गेले होते. त्यावेळी काही अज्ञातांनी त्यांच्या मोटारीवर दगडफेक केली. यामध्ये सुदैवाने राहुल गांधी यांना कोणतीही इजा झाली नाही. परंतु, त्यांच्या मोटारीच्या काचा फुटल्या आहेत.

या हल्ल्याच्या निषेधार्थ पिंपरी-चिंचवड शहर काँग्रेसच्या वतीने शनिवारी आंदोलन करण्यात आले. यावेळी या कृत्याचा निषेध व्यक्त करत भाजप सरकारच्या विरोधात जोरदार घोषणा बाजी करण्यात आली.