- मुख्यमंत्री देवेंद्र फडणवीस यांचे निर्देश
मुंबई – राज्यातील सर्व गाव नमुना नंबर सातबारा व फेरफार नोंदी नागरिकांना सुरळीतपणे व विनाअडथळा मिळावेत यासाठी ही कागदपत्रे “क्लाऊड’वर ठेवावीत. त्यासाठी आराखडा तयार करून एक महिन्यात त्याची प्रक्रिया सुरू करण्याचे निर्देश मुख्यमंत्री देवेंद्र फडणवीस यांनी दिले.
डिजिटल सातबारा उताऱ्यासंदर्भात मुख्यमंत्री देवेंद्र फडणवीस यांनी आढावा घेतला. त्यावेळी त्यांनी वरील सूचना केल्या. यावेळी महसूलमंत्री चंद्रकांत पाटील, राज्यमंत्री संजय राठोड व अधिकारी उपस्थित होते.
मुख्यमंत्री फडणवीस म्हणाले की, डिजिटल इंडिया लॅंड रेकॉर्ड प्रकल्प महत्त्वाचा असून याअंतर्गत राज्यातील सर्व सातबारा उतारे व फेरफार नोंदी या ऑनलाईन ठेवण्यात येत आहेत. हे ऑनलाईन झालेले सातबारा उतारे स्थानिक सर्व्हर व स्टेट डेटा सर्व्हरवर ठेवण्यात आले आहेत. सातबारा उताऱ्यांची संख्या मोठी असल्यामुळे हे सर्व उतारे “क्लाऊड’वर ठेवण्यात यावेत. यासाठी राज्य शासनाने “क्लाऊड’ तंत्रज्ञान वापराचे धोरण तयार केले आहे.
ई-फेरफार व डिजिटल सातबारा प्रकल्प सुरळीत चालण्यासाठी सर्व कागदपत्रे ही क्लाऊड तंत्रज्ञानाचा वापर करून साठविणे आवश्यक आहे. त्यासाठी ही कार्यवाही तातडीने पूर्ण करण्यासाठी आराखडा तयार करावा, अशी सुचना त्यांनी केली.
