भुजबळ यांचा रुग्णालयातील मुक्काम वाढला;
मुंबई : महाराष्ट्र सदनासह अन्य काही गैरव्यवहारांप्रकरणी मुंबई उच्च न्यायालयाने जामीन मंजूर केल्यानंतर राष्ट्रवादी काँग्रेसचे ज्येष्ठ नेते छगन भुजबळ केईएम रुग्णालयातून स्वगृही केव्हा जातील याविषयी चर्चा सुरू आहे. वैद्यकीय कारणास्तव त्यांचा रुग्णालयातील मुक्काम वाढला आहे. जामीन मिळण्याबाबतची सर्व प्रक्रिया रविवारी पूर्ण झाली असल्याने त्यांच्या रुग्णालयातून सुटकेकडे सर्वांचे लक्ष लागले आहे.
मार्च २०१६ पासून अटकेत असलेल्या छगन भुजबळ यांना मुंबई उच्च न्यायालयाने जामीन मंजूर केल्यानंतर न्यायालयीन प्रक्रिया पूर्ण होताच त्यांचा सुटकेचा मार्ग मोकळा होणार असल्याचे स्पष्ट झाले होते. जामिनाच्या सुटकेसंदर्भात आवश्यक असणाऱ्या कागदपत्रांवर भुजबळ यांनी रविवारी स्वाक्षऱ्या केल्या. त्यामुळे त्यांची जामिनावरील सुटकेची प्रक्रिया पूर्ण झाल्याचे सांगण्यात येते. परंतु, भुजबळ यांना रुग्णालयातून घरी पाठवण्याचा निर्णय हा सर्वस्वी डॉक्टरांच्या सल्ल्यावर अवलंबून राहणार आहे.
आणखी चार-पाच दिवस?
भुजबळ यांच्या जामिनावरील सुटकेसंदर्भात रविवारी पोलिस अधिकारी कागदपत्रांसह केईएम रुग्णालयात पोहोचले. साधारण अडीच तासांपर्यंत ही सारी प्रक्रिया पूर्ण झाल्याचे सांगण्यात आले. परंतु, केईएममध्ये भुजबळ यांच्यावर उपचार करणाऱ्या डॉक्टरांच्या संमतीनंतरच त्यांना घरी जाण्यास मिळणार आहे. त्यास आणखी चार ते पाच दिवसांचा कालावधी लागेल, असाही अंदाज व्यक्त केला जात आहे.