पिंपरी ः कार्यक्रमासाठी माहेरी गेलेल्या पत्नीला सासरचे लोक नांदायला पाठवत नसल्यानं आलेल्या नैराशेतून तरुणाने गळफास घेऊन आत्महत्या केली. आत्महत्येपूर्वी त्याने सासू-सासरे आणि मेहुण्याचे फोटो अंगाला चिटकवले. तसेच माझ्या मृत्यूला पत्नी व सासरचे लोक जबाबदार असल्याचे चित्रीकरण मोबाइलमध्ये करून ठेवले.
रूपेश उत्तम जाधव (२८, रा. खंडेवस्ती, मोशी) असे आत्महत्या केलेल्या तरुणाचे नाव आहे. सोमवारी रात्री उशिरा मोशी येथील खंडेवस्तीमध्ये एका तरुणाने गळफास घेतल्याची माहिती एमआयडीसी पोलिसांना मिळाली. पोलीस घटनास्थळी दाखल झाले. त्यावेळी रूपेश हा गळफास घेतलेल्या अवस्थेत आढळून आला. तसेच त्याने स्वतःच्या अंगाला सासू-सासरे आणि मेहुण्याचे फोटो चिटकल्याचे दिसले. पोलिसांनी तात्काळ रूपेशला रुग्णालयात दाखल केले. मात्र, उपचारापूर्वीच त्याचा मृत्यू झाल्याचे डॉक्टरांनी सांगितले. पोलिसांना त्याच्या खोलीत त्याचा मोबाइल सापडला. त्यामध्ये माझ्या मृत्यूस पत्नी, सासू-सासरे आणि मेहुणा जबाबदार असल्याचे त्याने म्हटले आहे. हा सर्व प्रकार मोबाइलमध्ये चित्रीकरण झाला असल्याचे घटनास्थळी गेलेल्या पोलिसांनी सांगितले.
रूपेश हा मूळचा नाशिक जिल्ह्यातील सटाणा येथील होता. त्याचे आई-वडील गावीच असून त्याचे चुलते त्याच्या शेजारीच राहतात. दोन-तीन वर्षापूर्वी नाशिक येथील एका मुलीसोबत त्याचे लग्न झाले होते. दोन महिन्यांपूर्वी कार्यक्रमानिमित्त त्याची पत्नी माहेरी गेली ती परत आलीच नाही. रूपेश हा तिला आणण्यासाठी सासरवाडीला गेला होता. मात्र, पत्नीला सासरच्या मंडळींनी पाठवले नाही. त्यामुळे तो निराश होता. सोमवारी रात्री तो खोलीत आला. त्याने स्वतःच्या अंगाला सासू-सासरे आणि मेहुण्याचा फोटो चिटकवून गळफास घेतला. या प्रकरणी एमआयडीसी भोसरी पोलीस तपास करत आहेत.
