केजरीवाल सरकारमध्ये रेशन घोटाळा – कॅग
नवी दिल्लीः दिल्लीत केजरीवाल सरकारमध्ये रेशन घोटाळा झाल्याचा ठपका कॅग अर्थात महालेखापालांनी ठेवला आहे. यावरून मुख्यमंत्री अरविंद केजरीवाल यांनी घोटाळेबाजांना इशारा दिला आहे.
कॅगच्या अहवालात नमूद प्रकरणांमधील दोषींविरोधात कठोर कारवाई करणार असल्याचे केजरीवाल यांनी म्हटले आहे. कॅगच्या अहवालात ठपका ठेवलेल्या ५० प्रकरणांची चौकशी सीबीआयद्वारे करण्याचा निर्णय दिल्ली सरकारने घेतला आहे, अशी माहिती सूत्रांनी दिली.
अर्थ, महसूल, समाज कल्याण आणि आर्थिक क्षेत्रासंबंधी कॅगने २०१६-१७ चे तीन अहवाल दिल्ली सरकारला दिले आहेत. हे अहवाल विधानसभेत मांडल्यानंतर केजरीवाल यांनी यासंदर्भात ट्विट केले. कॅगने नमूद केलेल्या सर्व भ्रष्टाचाराच्या प्रकरणांमधील दोषींविरोधात कडक कारवाई करणार. याप्रकरणातील एकाही दोषीला सोडणार नाही, असं केजरीवाल यांनी ट्विटमध्ये म्हटले आहे.
दिल्लीत रेशन घोटाळ्यात माफिया सक्रीय आहेत. त्यांना वाचवण्यासाठीच नायब राज्यपाल घरपोच रेशन सेवेचा प्रस्ताव नाकारत आहेत, असा आरोप केजरीवाल यांनी केला. तसंच घरपोच रेशन सेवा दिल्यास या क्षेत्रातील माफिया संपुष्टात येतील, असा दावाही केजरीवाल यांनी केला आहे.