आता पत्नी माझ्यावर टीका करते म्हणाल: केजरीवाल
नवी दिल्ली: आपचे पदाधिकारी कुमार विश्वास यांनी टि्वटरवर अपलोड केलेल्या व्हिडिओमुळे नाराज नसल्याचे दिल्लीचे मुख्यमंत्री अरविंद केजरीवाल यांनी म्हटले आहे. ‘आता मीडिया असेही म्हणेल की माझी बायको मला ‘टारगेट’ करते आहे,’ अशी चेष्टाही केजरीवाल यांनीही केली आहे.
‘कुमार कौटुंबिक सदस्यासारखा आहे. मी त्याच्यावर रागावलेलो नाही,’ असे केजरीवाल यांनी एका मुलाखतीत म्हटले आहे. ‘तो केवळ पक्षसदस्य नाही, कुटुंबाचा सदस्य आहे. मीडियाला राळ उठवायला कोणताही मुद्दा चालतो. आता तुम्ही असेही म्हणाल की माझी बायको माझ्यावर टीका करत आहे,’ असे केजरीवाल गमतीत म्हणाले.
आपचे पदाधिकारी असलेल्या कुमार विश्वास यांनी त्यांच्या टि्वटर अकाउंटवरून एक व्हिडिओ जारी केला आहे, ज्यात त्यांनी केंद्र सरकारसह दिल्लीतल्या आप सरकावरवरदेखील टीका केली आहे. भ्रष्टाचाराच्या मुद्द्यावरून सत्तेत आलेला आपच आता भ्रष्टाचाराला खतपाणी घालत असल्याची टीका यात विश्वास यांनी केली आहे. देशाच्या सुरक्षिततेच्या मुद्द्यावर विश्वास यांनी या व्हिडिओत प्रामुख्याने भाष्य केले आहे. या व्हिडिओला टि्वटरवरूनच प्रतिक्रिया देताना केजरीवाल यांनी ‘शानदार’, हा व्हिडिओ तुम्हाला हादरवून टाकेल असे म्हटले आहे. पण प्रसारमाध्यमांनी या व्हिडिओमुळे केजरीवालच हादरल्याचे वृत्त दिले आहे. त्यावर केजरीवालांनी, मीडिया आता माझी बायकोच माझ्यावर टीका करतेय असेही म्हणेल, अशा शब्दांत मीडियाची खिल्ली उडवली आहे.