नवी दिल्ली: देशभरात प्रजासत्ताक दिन साजरा होत असून गुगलनेही डुडलद्वारे देशवासियांना प्रजासत्ताक दिनाच्या आगळ्यावेगळ्या शुभेच्छा दिल्या आहेत. ‘India’s Republic Day’ असं शिर्षक देऊन गुगलने खास डुडल तयार केलं आहे.
गुगलने या डुडलची अत्यंत सुबक आणि कलरफुल डिझाइन केली आहे. या रंगबीरंगी डुडलमध्ये राष्ट्रपती भवन दाखविण्यात आले आहे. राष्ट्रपती भवनासमोर राजपथावर भारताचा ऐतिहासिक वारसा आणि संस्कृतीचं दर्शन घडवण्यात आलं आहे. ‘१९५५मध्ये प्रजासत्ताक दिनाची पहिली परेड राजपथावर झाली होती. आम्ही भारतीय संविधानाच्या ७० व्या वर्षाच्या उत्सव गुगल डुडलद्वारे साजरा करत आहोत,’ असं गुगल इंडियाने ट्विटरवर लिहिलं आहे.
भारताला स्वातंत्र्य मिळाल्यानंतर १९५०मध्ये संविधान लागू करण्यात आलं होतं. त्यानिमित्ताने दरवर्षी २६ जानेवारी रोजी देशात प्रजासत्ताक दिन मोठ्या उत्साहात साजरा केला जातो. राजधानी दिल्लीत राजपथावर त्यानिमित्त तिन्ही दलाचे संचलन होते.
