मुंबई – एका व्यक्तीने स्वतःच्याच सुंदर दिसणाऱ्या पत्नीवर इतर पुरुषांची वाईट नजर पडू नये म्हणून तिचा चेहराच विद्रूप केल्याची घटना उघडकीस आली आहे. या व्यक्तीला मुंबई पोलिसांनी बेड्या ठोकल्या आहेत.
राज रायकवार असे या व्यक्तीचे नाव असून तो मूळ मध्य प्रदेशमधील जबलपूरचा रहिवासी आहे. नोकरीनिमित्त तो मुंबईत राहतो पण त्याची पत्नी आणि मुलं जबलपूरमध्येच राहतात. राज हा ड्रायव्हर असून चित्रपटाच्या चित्रीकरणासाठी लागणाऱ्या कॅमेऱ्यांची ने – आण करण्याचं काम तो करतो.
स्वतः जबरपूरमध्ये राहत नसल्याने आपल्या अनुपस्थितीत आपल्या सुंदर दिसणाऱ्या पत्नीवर कुणाची तरी वाईट नजर पडेल अशी भीती त्याला नेहमी वाटायची. याच चिंतेतून त्याने एक दिवस मच्छर मारण्याच्या कॉईल लावायला वापरण्यात येणाऱ्या पत्र्याच्या स्टँडच्या सहाय्याने पत्नीच्या चेहऱ्यावर वार केले आणि तिचा चेहरा विद्रूप केला. त्याची पत्नी शिक्षीका असून तिने राजविरोधात जबलपूरमध्ये गुन्हा दाखल केला होता. पण दोन दिवसांपूर्वी मुंबई क्राइम ब्रांचने त्याला वेगळ्याच एका प्रकरणात बेड्या घातल्या.
