मुंबई : माजी क्रिकेटपटू विनोद कांबळी याच्या पत्नीने गायक अंकित तिवारी याच्या वृद्ध वडिलांना मारहाण केली. असा आरोप अंकितच्या भावाने केला असून तिच्याविरोधात पोलिसांत तक्रार दाखल केली आहे. अंकित तिवारीच्या वडिलांनी आपल्याला चुकीच्या पद्धतीने स्पर्श केल्याचा आरोप कांबळीची पत्नी अँड्रियाने केला आहे.
ही घटना रविवारी दुपारी मालाडच्या इन ऑर्बिट मॉलमध्ये घडली. कांबळीने एका वर्तमानपत्राशी बोलताना याविषयी माहिती दिली. ‘आम्ही दुपारी ३च्या सुमारास मॉलच्या गेम झोनमध्ये होतो. तेव्हा एका वृद्ध व्यक्तीने माझ्या पत्नीला विकृत स्पर्श केला. तिने त्याचा प्रतिकार केला आणि त्याला तिथल्या तिथे रोखले. नंतर काही मिनिटांनी आम्ही फूड कोर्टमध्ये असताना दोन पुरुष तिथे आले. ते त्याचे मुलगे असावेत. त्यांनी माझ्या बायकोला मारण्याचा प्रयत्न केला. मी त्यांना रोखले असता आम्ही कोण आहोत तुम्हाला माहित नाही अशी धमकीही दिली.’
अंकित तिवारीचे वडिल आर. के. तिवारी यांनी अँड्रियाने त्यांना ठोसा मारल्याचा आरोप केला आहे. कांबळीने या घटनेबाबत काल टि्वट केलं होतं. त्यानंतर वांद्रे पोलीस ठाण्याच्या एका अधिकाऱ्याने कांबळीची त्याच्या घरी जाऊन भेटही घेतली. अंकित तिवारीचा भाऊ अंकुर तिवारी आपली पत्नी, मुलं आणि वडिलांसोबत मॉलमध्ये गेला होता. त्याने बांगुर नगर पोलीस ठाण्यात कांबळी पती-पत्नीविरोधात तक्रार दाखल केली आहे. तूर्त आम्ही अदखलपात्र गुन्हा दाखल केला असल्याचे बांगुर नगर पोलीस ठाण्याचे वरिष्ठ पोलीस निरीक्षक विनय बाणे यांनी सांगितले.
