मुंबईतील लोकल ट्रेनमधून प्रवास करणाऱ्या महिलांच्या सुरक्षेचा प्रश्न पुन्हा एकदा ऐरणीवर आला आहे. हार्बर मार्गावर महिलांच्या डब्यात घुसलेल्या तरुणाने डब्यातील महिला प्रवाशासमोर हस्तमैथून केल्याची धक्कादायक घटना समोर आली आहे. विशेष म्हणजे या प्रकरणात महिला प्रवाशाने तक्रार दिली नसल्याने गुन्हा दाखल करता येणार नाही, असे सांगत पोलिसांनी गुन्हा दाखल करण्यास टाळाटाळ केली.
जितेश उतेकर हे शुक्रवारी हार्बर मार्गावरील सीएसटीएम – पनवेल लोकल ट्रेनने प्रवास करत होते. दुपारी २ वाजून ४२ मिनिटांनी त्यांनी ही ट्रेन पकडली. उतेकर हे फर्स्ट क्लासलगतच्या डब्यातून प्रवास करत होते. दुपारची वेळ असल्याने ट्रेनला फारशी गर्दी नव्हती. ट्रेन सीएसटीएम स्थानकातून बाहेर पडताच फर्स्ट क्लासच्या डब्यातून एका महिलेचा ओरडण्याचा आवाज आला. उतेकर यांनी महिला डब्यात जाळीतून बघितले असता डब्यात महिलेशेजारी एक तरुण बसलेला दिसला. ‘हा तरुण माझ्यासमोर विकृत चाळे करत आहे’, असे त्या महिलेने उतेकर यांना सांगितले.
उतेकर व अन्य प्रवाशांनी आरडाओरडा करताच त्या तरुणाने पँटची चेन बंद केली आणि दरवाज्याजवळ जाऊन उभा राहिला. मस्जिद स्थानक येताच त्याने धावत्या ट्रेनमधून उडी मारली आणि रुळ ओलांडून दुसऱ्या प्लॅटफॉर्मवरुन पळून गेला.
