हैदराबाद: तामिळनाडू हे देशातील सर्वात भ्रष्ट राज्य असल्याचे समोर आले आहे. देशातील १३ मोठ्या राज्यांमध्ये केलेल्या पाहणीतून हा निष्कर्ष काढण्यात आला आहे. ‘सीएमएस-इंडिया’नं या संदर्भात सर्वेक्षण केले आहे. त्यातून ही माहिती समोर आली.
या माध्यमातून संबंधित राज्यातील नागरिकांची शासकीय कर्मचाऱ्यांबद्दलची मते, लाच मागण्याचे प्रमाण, भ्रष्टाचारविरोधी चळवळी असे विविध प्रश्न विचारण्यात आले. या प्रश्नांना नागरिकांनी दिलेल्या उत्तरांवरून सर्वाधिक भ्रष्ट आणि कमीत कमी भ्रष्ट राज्यांची यादी तयार करण्यात आली. त्यात तामिळनाडू पहिल्या तर तेलंगण दुसऱ्या क्रमांकावर आहे. तेलंगणमधील ७३ टक्के नागरिकांना शासकीय कामांसाठी लाच द्यावी लागल्याचे समोर आले. त्याचबरोबर पंजाब, गुजरात आणि आंध्र प्रदेशमध्ये भ्रष्टाचाराचं प्रमाण जास्त असल्याचं उघडकीस आले आहे.
देशातील ७५ टक्के लोकांच्या मते, गेल्या एका वर्षात भ्रष्टाचाराच्या प्रमाणात काहीही बदल झालेला नाही. पण २००५च्या तुलनेत भ्रष्टाचाराचं प्रमाण निम्म्याहूनही कमी झाले आहे, असेही सर्वेक्षणातून पुढे आले आहे. महाराष्ट्र, उत्तर प्रदेश, बिहार या राज्यांमध्ये भ्रष्टाचारविरोधी चळवळी मोठ्या प्रमाणावर सक्रिय असल्याचेही स्पष्ट झाले आहे.
