क्वात्रोची आणि अँडरसन हे राहुल गांधींचे मामा-मोदी
बोफोर्स घोटाळ्यात हात असलेला क्वात्रोची आणि भोपाळ गॅस दुर्घटनेला जबाबदार असलेला अँडरसन हे दोघे राहुल गांधींचे मामा होते. त्याचमुळे त्यांना भारतात गुन्हे करूनही खास विमानाने अमेरिकेला पळवून देण्यात आले असा आरोप पंतप्रधान नरेंद्र मोदी यांनी केला. मध्यप्रदेश आणि इतर राज्यातील निवडणुकांच्या पार्श्वभूमीवर ते बोलत होते. भोपाळमध्ये झालेल्या गॅस दुर्घटनेमुळे हजारो लोकांना प्राण गमवावे लागले. या दुर्घटनेला जबाबदार असलेल्या अँडरसनला राजीव गांधींनी पळवून लावले. अँडरसन आणि क्वात्रोची या दोघांनाही लपून छपून अमेरिकेत पोहचवण्यात आले शिवराज सिंह चौहान यांच्यावर आरोप करण्याआधी या दोघांबाबत आईला विचारा असाही खोचक सल्ला पंतप्रधान नरेंद्र मोदी यांनी दिला.
शिवराज सिंह चौहान यांना लोक मामा म्हणतात त्यामुळे तुमची अडचण होते आहे. तुमचे मामा अँडरसन आणि क्वात्रोची या दोघांनी काय केले आहे? ते जरा विचारा. भारताच्या तिजोरीवर या दोघांनीही डल्ला मारला. भारतीय सुरक्षेचे तीन तेरा वाजवले. बोफोर्स घोटाळा माझ्या मामानेच केला हे जरा मध्यप्रदेशातल्या लोकांना सांगा की असेही नरेंद्र मोदी यांनी त्यांच्या भाषणात म्हटले आहे.
काँग्रेस नेते राज बब्बर यांनी पंतप्रधान नरेंद्र मोदींच्या आईबाबत एक वादग्रस्त वक्तव्य केले होते त्याचेही उत्तर नरेंद्र मोदींनी भाषणात दिले. माझ्या आईला राजकारणातला र देखील माहीत नाही. पूजा करणे, देवासमोर जप करत आपला वेळ घालवणे हीच तिची दिनचर्या आहे. माझ्याशी सामना न करता येणाऱ्या काँग्रेसने माझ्या आईलाही राजकारणात खेचले असाही आरोप पंतप्रधान नरेंद्र मोदी यांनी केला.
काँग्रेसकडे माझ्याविरोधात बोलण्यासारखे मुद्दे उरलेले नाहीत. म्हणून आता माझ्या आईला नावे ठेवली जात आहेत. माझ्या आईचा अपमान केला जातो आहे. देशाला स्वातंत्र्य मिळाल्यानंतर ज्या पक्षाने देशावर सर्वात जास्त काळ राज्य केले ते त्या जबाबदार पक्षाचे लोक माझा सामना करण्याऐवजी माझ्या आईवरून माझ्यावर टीका करत आहेत ही खरोखरच लाजिरवाणी बाब आहे असेही मोदी यांनी म्हटले आहे.